2005-08-02



الظهر الساعة 2 أمي تقومني من النوم:
-قومي إلى الحين نايمة قومي توضي وصلي وادعي للملك فهد الله يغفر له ويرحمه.
أنا كنت أحسب إني أحلم.
بعد شوي..أختي:
-قومي يالمعفنة إلى الحين نايمة قومي يله الملك فهد مات.
أنا بديت أصحصح بس الدنيا لسه أبيض وأسود ، أشوف الساعة 2 وربع والمكيف
مطفي وأنا مسلوقة من الحر.
أمي رجعت:
- يله يابنت بسك نوم قومي ادعي للملك فهد.
أنا انفجرت:
-طيب خلاااص لا تقولين لي أنا مالي دخل ، مات الله يرحمه وش لي دخل فيه أنا
أمي زي اللي طلعت عيونها شوي:
- وش تقولين أنتي يابنت؟ لولا الله ثم هو كان الله أعلم وش حنا صايرين عليه
وبعدين هذا جزاي أعزيك
- وشو؟ تعزيني؟ ليه هو عمي ولا خالي؟ عشان تعزيني وش يقربلي هو؟
أمي وجهها محتار و محيوس شوي:
-هذا ملكنا وهو اللي حافظ لنا السعوديه و..
كانت شكلها بتبدأ محاظرة على الريق
-زين..خلاص..فهمت
ما كان لي خلق اطول معها فقمت و توضيت وصليت ودعيت له
الله يغفر له ويرحمه
الله يدخله الجنة
الله ييسر حسابه
يارب تجعل مكانته في الآخرة أحسن منها في الدنيا
قولوا آمين
__________________
وطوال اليوم كل من قابلني"تدرين الملك فهد مات"
طيب أنا ايش ذنبي أسمع أخبار سوداء كل شوي!!
قررت إني ما أقرب التلفزيون طول الأسبوع

وفي العصر ، أهلي في الصالة ,أنا نازلة أمي تنادي:
-منيييرااااه تعالي اقعدي معنا
-طيب طفوا التلفزيون أول
-ليه؟ شفيك؟
-قاعدين يتكلمون عن الملك فهد؟
-إيه
-طيب تبيني أجي طفيه
-ليه أنا قاعدة أتابع
-أنا ما ابي أسمع
-شفيك؟ تعالي باكلمك بقولك شئ
-لا أول طفوا التلفزيون
-أسم الله عليك وش فيك؟
-ما فيني شئ بس ما أبي أسمع كلامهم يقلق
-يابنت وش هالطاري الجديد؟
-ولاشي بس تبيني أنا بغرفة المعيشة.
صاير التلفزيون يخوف ما أبي حتى أسمع صوته من بعيد
________________________________

أختي تبكي و أمي ضايق صدرها
بس أحس أنهم كذابين
قالوا لأنفسهم إنهم حزينين وصدقوا الكذبة
أصلا لو ما أحد قالهم ما دروا ولا حسوا ولا حزنوا
أنا ما أبي أدري ولو بيدي كان ما دريت بس وين ما أروح
ألقى من يتطوع ويعيد " الملك فهد مات"
طب يا ناس فكوني من سماع هالخبرية الله يرحمه
كل يوم ربي يستافي ناس واجد ولا أحد يدري ولا أحد يبكي ولا صار شئ
ليش المفروض أحزن يوم ربي أخذ أمانته بهالشخص الغريب عني تماما
ولا إذا ما حزنت بعد المفروض أحس بالذنب لأني سويت شئ خطأ!!
________________________________
ما فيني ولا ذرة حزن ولا عندي أي استعداد أمثل
الله يغفر له ويرحمه ويسكن روحه الجنة
ويعوض من فقده بأحسن منه
آمين
ما يحتاج إلا الدعاء الحين
________________________________

5 Comments:

Blogger Disoriented said...

تصدقين قبل لا يتوفى كنت اقول في نفسي اذا مات راح اكيد راح ابكي عليه لكن يوم سمعت الخبر ولا بكيت ولا شي لأنه مريض ومتوقع انه يموت في اي لحظه واحنا جالسين الحين نفكر بالوضع الجديد وكيف السعودية بتصير في عهد الملك عبدالله هذا شاغلني اكثر
الله يرحمه ويغفرله يارب

12:47 م  
Anonymous غير معرف said...

ma gelna lazim tebkeen, wala te7zineen, bess ya laitkom ma tefashloona ma3 5alg allah 3al el internet o tessawooon enikom nas ma tegadroon el 5air elli entoom feeha ibhal balad.

wel '3uraf ma tebeen ted5ileenha 3alashan ma tebeen tesmi3een el tilfizyoon.. wallah 7assafa el denya 3ala hal tafaha. allah yekoon ib3oonik.

12:20 ص  
Blogger miss messy said...

__Disoriented__
آمين ويسكنه فسيح جناته

تعرفين..ما أتوقع يكون فيه تغيير لأن قبل وفاته الله يرحمه واثناء مرضه
كان ولي العهد هو الحاكم الفعلي تقريبا ولا سوا شئ يخلينا نتوقع حاجة
زي كذا والحمدلله حنا ماشين بتغيير أو بدونه بس أكيد إذا فيه تغيير
للأحسن ما راح نرفض


__MR.Anonymous__
شكلي أذيتك بكلامي
ما قصدي أفشلكم ولاشي ليه هو فيه أحد وده يفشل نفسه؟ كلنا ندري
إن السعودية إذا مو من أحسن البلدان فهذا لأنها أحسن بلد بالدنيا
ولو أحمد ربي من الحين لين أموت على هالنعمة اللي أنا فيها ما وفيتها
حقها بس عسى الله يقدرنا نشكره
ما ظنتي أحد بيكون فكرة عننا كلنا من صفحة وحدة
إلا إذا كان يبي تصوره يكون ناقص؟؟ هذا شي راجع له
وترى المفروض تشكرني :) ليه؟ لأني أعطي مصداقية لعواطف الباقين.لول
وإلى الحين محرمة اقرب الصالة..لول..يمكن يكون تفكيري تافه كل شي جايز
وعلى قولتك الدنيا كلها ما تسوى و لا حتى قشر فصفص
آمين الله يكون بعوننا كلنا

6:23 ص  
Blogger Aliya said...

You are right in that we have no idea how he was personally but he did do plenty to pay our respects to him. And that you did, you prayed and asked God to forgive him. Some people feel closer to him than you did but I don't know. I've lived with King Fahad all my life that's why I feel sad because he is the only one I knew. Inshallah King Abdullah will be better and stronger.

I'm sorry bas '9a7akt yoom gelt "أختي تبكي و أمي ضايق صدرها
بس أحس أنهم كذابين
قالوا لأنفسهم إنهم حزينين وصدقوا الكذبة "

Allah yhdeeki bas :P dammk 5afeef even if it's not at the right time :P

8:01 ص  
Blogger mashi_97 said...

موضوعك قد قرأتهــا قبل أن اسجل في البلوقر
وبعد أن سجلت ظللت أبحث على موقعك حتى وجدته أخيـراً
لأنك وبكل صراحه
أجرأ واصدق
من تحدث عن وفاة الملك فهد
في عالم المدونات السعودية

4:47 ص  

إرسال تعليق

<< Home